குழந்தைகள் தின சுழல் கேள்விகள்..

குழந்தைகள் தினத்துக்காக 2014ல் ஃபேஸ்புக்கில் கீழ்க்கண்ட கேள்விகளை நால்வரைக் கேட்கவேண்டும் என்பது போட்டிவிதியாக வைத்து சுழற்சி முறையில் ஒருவருக்கொருவர் கேட்டுக்கொண்டிருந்தனர். 

 எழுத்தாளர் பா.ராகவன் அவர்கள் எனக்கும் இந்தக்கேள்விகளை அனுப்பி இருந்தார்..

 1. சின்ன வயதில் கண்ட fantacy கனவு எது? 

ஒரு கனவு என்றெல்லாம் எனக்கு சொல்லத்தெரியவில்லை. யாராவது ஏதாவது ஒன்றைச் சிறப்பாகச் செய்தால் அன்றிரவே ஒரு மாபெரும் கூட்டத்தின் நடுவே அந்த செயலை சிறப்பாக செய்துகாட்டுவதாகவும், எல்லோரும் என்னைப் புகழ்வதுபோலவும் கனவு வரும். இது கல்லூரிகாலம் வரை தொடர்ந்தது. இந்த வகையில் நான் கூத்தாடியாக, சர்க்கஸில் சைக்கிளில் சுற்றுபவனாக, விவேகானந்தராக, சிறந்த பேச்சாளனாக, சிறந்த ரயில் ட்ரைவராக, எங்கள் கல்லூரியின் கண்ணன்சார் பாராட்டும் சிறந்த ப்ரொஃப்சராக இப்படி ஏகப்பட்ட கனவுகள். :) 

2. பள்ளிக்குச் செல்லும் வழியில் அனுபவித்த மறக்கமுடியாத விஷயம்? 

நானும் என் நண்பன் சரவணக்குமாரும் ரோடுபோட வைத்திருந்த தார்டின்னில் இருந்த தாரை உருண்டையாக உருட்டி சாலையில் லாரி வரும்போது உருட்டி விடுவோம். அது தரையோடு நசுங்குவதைப் பார்ப்பது ஒருவிளையாட்டு. எங்கள் கெட்ட நேரம் ஒரு கோவக்கார லாரி ட்ரைவர் நாங்கள் என்னமோ வண்டிக்குள் உருட்டிவிடப்போகிறோம் என்பதை தூரத்திலேயே தெரிந்துகொண்டு எங்கள் அருகில் வந்து லாரியை நிறுத்தி எங்கள் இருவரையும் பொடனியில் அடித்து லாரியில் ஏற்றி வண்டியைக் கிளப்பிவிட்டார். சரி எங்கையே கண்கானாத இடத்துக்கு கொண்டுபோய் கொல்லப்போறார்னு நெனச்சிட்டிருந்தா 5 நிமிஷத்துல எங்க ஊர் எல்லையில இறக்கிவிட்டு மீண்டும் பொடனியில் ஒரு அப்பு அப்பி இனிமே இப்படி செஞ்சீங்க மதுரையில கொண்டுபோய் விட்ருவேன் எனச் சொல்லிச் சென்றார். லாரியில் இருந்து கீழே இறங்கி ஸ்டெடியாக நிற்க அரைமணி நேரத்துக்கு மேல் ஆனது. 

3. மறக்க முடியாத புத்தகம்? ஏன்? 

நான் புத்தகம் வாசிக்க ஆரம்பித்ததே 11ம் வகுப்புக்கு பிறகே. தி.ஜா வின் மோகமுள்தான் அப்படியே கட்டிப்போட்ட புத்தகம். பாபுவும், யமுனாவும் கிட்டத்தட்ட 1 வாரத்துக்கு மேல் என்னைவிட்டு இறங்கவில்லை. அதுவரை எனக்குப் பிடித்த பெயர் என நினைத்துக்கொண்டிருந்த காயத்ரி மனதில் இருந்து விலகி யமுனா என்ற பெயர் மந்திரம் போல அமர்ந்துகொண்டது. எல்லாப் பெண்களிலும் யமுனாவையே தேடிக்கொண்டிருந்தேன், பல ஆண்டுகளாக. மோகமுள் திரைப்படத்தை நான் பார்த்தது ஆகப்பெரிய தவறு. என் கற்பனையில் இருந்த என்றுமே சந்திக்க முடியாதோ என நினைத்துக்கொண்டிருந்த யமுனாவை இழந்து.விட்டேன் :) 

4. எந்த விளையாட்டில் கெத்தாக விளங்கினீர்கள்? 

பரிசு வாங்குமளவு விளையாட்டில் ஜொலித்ததில்லை. ஆனால், எங்கள் பி ஈ டி வாத்யாருக்கு இவன் டென்னிகாய்ட்டில் நல்லா வருவானோ, பேட்மிண்டனில் நல்லா வருவானோ, 100 மீட்டரில் ஓட பயிற்சி கொடுத்தா நல்லா வருவானோ என எண்ணம் வரும் அளவு மட்டுமே இருந்திருக்கிறேன். ஆனால், எதிலுமே நன்றாக வந்ததில்லை. 

5. பாலியத்துக்குத் திரும்பினால் எதை மாற்ற விரும்புவீர்கள்? 

நான் படிப்பில் மிகச் சுமார். உண்மையைச் சொல்வதாய் இருந்தால் மஹா மக்கு. இன்னொரு வாய்ப்புக்கிடைத்தால் நன்றாக படிப்பேன். ஏதேனும் ஒரு விளையாட்டிலாவது ஜொலிக்க முயல்வேன். பெற்றோருக்கு அடங்கிய பிள்ளையாக இருக்க முயல்வேன். இவனெல்லாம் எங்க உருப்பட? என்ற வார்த்தையை பெரியவர்களிடம் கேட்காமல் வளர முயல்வேன். :) இக்கேள்விகளை இன்னும் நான்கு பேரிடம் கேட்கவேண்டுமென்று சொன்னார்கள். அந்த சுழல் கேளவிகளை நான் கேட்டிருந்தது

 Prakash Rajagopal Raj SuperRaj Sudhakar Kasturi Jayashree Govindarajan. இதில் ஜெயஸ்ரீ கோவிந்தராஜன் மட்டுமே பதிலளித்தார்கள் என்பதையும் இங்கே பதிவு செய்து விடுகிறேன். :)

தமிழக முக்கிய செய்திகள். (நவம்பர் 2014)

01. நாடாளும் மக்கள் கட்சியின் பல லட்சம் தொண்டர்களுடன் காங்கிரஸில் இணைந்த கார்த்திக்கால் தமிழக அரசியல் நிலவரமே மாறிவிட்டதாகவும், அவரை அதிமுக, திமுக இரண்டும் தங்கள் கூட்டணியில் இணைய வ்ரும்படி தூது அனுப்பி இருப்பதாக கழுகார் / ஆந்தையார் / பூனையார் / எலியார் / பன்றியார் தெரிவிக்கின்றனர்.

02. வாசன் தனிக்கட்சி தொடங்கியதால் காங்கிரஸின் கோஷ்டிகளில் ஒன்று குறைந்ததாக காங்கிரஸ் கோஷ்டி மேய்ப்புக்குழு மகிழ்ச்சி தெரிவித்துள்ளது. இனி அவர் தனிக்கட்சி கோஷ்டி என்ற பிரிவின் கீழ் செயல்படுவார் என காங்கிரஸ் மேலிடம் அறிவித்துள்ளது. 

03. பாஜகவின் தமிழிசை சவுந்தர்ராஜன் புதுக்கட்சி வரவேற்புக்குழு தலைவராக தன்னிச்சையாக நியமித்தது செல்லாது என அறிவித்துள்ளது, தமிழக தமிழிசை எதிர்ப்புப்பிரிவு பாஜக. 

04. கரடியே காரித்துப்பிய கட்சிகளில் தாங்களே முடலிடம் என திமுகவும் ( பாமக மற்றும் மதிமுக கரடிகள் துப்பியதால்) நாங்களே என பாஜகவும் ( வாசன் கரடி துப்பியதால்) அறிவித்துள்ளன. 

05. மக்கள் முதல்வரே இன்னும் ஆட்சியில் இருப்பதாகவும் தமிழக முதல்வர் என்ற பதவி இன்னும் உருவாக்கப்படவில்லை என்றும் ஏஜென்ஸியை மேற்கோள் காட்டி செய்திகள் தெரிவிக்கின்றன. 

06. அதிமுக தாடி வளர்ப்புக்குழுவின் தலைவராக திரு.ஓ.பன்னீர்செல்வம் நியமிக்கப்பட்டுள்ளதாக நமது எம்ஜிஆர் செய்தி வெளியிட்டுள்ளது. 

07. நானே 2016ல் முதல்வர் என்ற சுப்ரமணியசாமியின் அறிவிப்பால் தமிழக பாஜக கோஷ்டிகள் ஒன்றிணைய வாய்ப்புள்ளதாகவும், அப்படி ஒன்று நிகழ வேண்டும் என்ற எண்ணத்திலேயே சு.சாமியை அமித்ஷா தூண்டிவிட்டதாகவும் டெல்லியில் இருந்துவரும் தகவல்கள் தெரிவிக்கின்றன. 

08. நாம் தம்ப்ளர், நாம் டபரா கட்சியும் தாங்களே முதல்வர் என்றும், டெபாசிட் கிடைக்கும் நிலை ஏற்பட்டால் மக்கள் முதல்வராக செயல்படுவோம் என சைமன் அறிவித்துள்ளார். 

09. அரசியல் அநாதைகளாக தாங்கள் ஆனதற்கு திராவிடக் கட்சிகளே காரணம் என தாவீது பாண்டியன் அறிவித்துள்ளார், இருப்பினும் கோபாலபுரத்திலும், போயஸ் கார்டனிலும் ஒற்றர்களை அமைத்துள்ளதாகவும் கதவு திறந்தால் உடனே பாய்ந்து உள்ளே செல்லும்படியும் உத்தரவிட்டுள்ளதாகவும் செங்கதிர் செய்தி வெளியிட்டுள்ளது. 

10. யாருக்கு ஆதரவாக அறிக்கை விடுவது என விடுதலை உணர்வுடன் சிந்திப்பதாக வீரமணி அறிக்கை விடுத்துள்ளார். 

11. இன்றைய தமிழக அரசியல் சூழ்நிலையில் ”லட்சிய திராவிட முன்னேற்றக்கழக”த்தை புறக்கனித்துவிட்டு யாரும் ஆட்சியமைக்க முடியாது எனப்பாட்டுப்பாடி பேட்டி கொடுத்துள்ளார் டி.ராஜேந்தர். இதைச் சொல்லும்போது ராஜேந்தர் கண்ணீர் மல்க நின்றிருந்ததாகவும், என்னசார் தனியா நின்னு அழுதுட்டு இருக்கீங்க? என்று கேட்ட நிருபரிடம் How do you say, I am alone, I am a Green Tamilan, do you know? How do you say that I am alone,, ? இறுதியாக தமிழண்டா, தமிழண்டா, தமிழன் தமிழன் எனப் பல்வேறு மாடுலேஷன்களில் சொன்னதாக புதிய பறவை செய்தியாளர் அவரது பிளாக்கில் எழுதியுள்ளார். 11. 2016 நம்ம கையிலே, சந்திப்போம்டா தோளா நம்ம சட்ட சபையில என குருவி, கத்தி நடிகரும், ஜாதிவாரியாக உள்ள நடிகர்கள் அனைவரும் சொல்லி இருப்பதையும் தமிழகம் உன்னிப்பாக கவனித்து வருவதாக கருணாநிதி கருத்து தெரிவித்துள்ளார். 

12. சமீபத்திய ஜாதி அரசியல் கட்சிகள் வெளியிட்ட மக்கள் தொகை எண்ணிக்கையை கூட்டிப்பார்த்த தமிழக மக்கள் தொகைக்கணக்கெடுப்பு குழுவினர் அதிர்ச்சி அடைந்துள்ளதாக தகவல்கள் தெரிவிக்கின்றனர். ஜாதிக்கட்சிகளின் கணக்குப்படி தமிழகத்தில் கிட்டத்தட்ட 70 கோடி மக்கள்தொகை இருப்பது தெரிய வந்துள்ளது. 

இத்துடன் செய்திகள் நிறைவடைந்தது.. வணக்கம்

சனிப்பெயர்ச்சி பலன்கள் ( 2014 - 2017வரை)

 ..... ராசி நேயர்களே.. ( உங்க ராசியை கோடிட்ட இடத்தில் நிரப்பி வாசிக்க ஆரம்பிக்கவும்) 

இந்த சனிப்பெயர்ச்சியினால் உங்களுக்கு பொதுவாக நல்லதே பெரும்பன்மையாக நடக்கும். சனி அர்த்தாஷ்டம சனியாக இருந்தாலும், பகைவர்களிடம் நட்பு பாராட்டுவதன் மூலம் வலிமையான பகைவர்களிடம் இருந்து தப்பிக்கலாம். மேலும், தேவையில்லாத சண்டைகள் உங்களுக்கு பாதிப்பையே ஏற்படுத்தும். 

பூர்வ புண்ணிய ஸ்தானம் வலுத்திருப்போர் கவலைகொள்ள தேவையில்லை. எத்தனை அடி வாங்கினாலும் உங்களை எல்லோரும் “நல்லவண்டா” எனப்புகழக்காண்பீர்கள். 

தொழில் மிகச் சிறப்பாக இருக்கும். அதற்கு முக்கியமாக கடின உழைப்பும், நாட்டு நிலவரத்தையும் நன்கு தெரிந்திருத்தல் நல்லது. எக்கனாமிக்ஸ் டைம்ஸ் உங்களுக்கு பேருதவியாக இருக்கும். 

குழந்தைகள் மூலம் பிரச்சினைகள் வர வாய்ப்புண்டு. அவர்களை கண்டிப்பதன் மூலம் உங்கள் மரியாதைக்கு பங்கம் வர வாய்ப்புண்டு. எனவே கவனம். 

காசு, பணம் விரயமாகும் காலமிது. எனவே இருக்கும் பணத்தில் கத்தி, கபடா போன்ற படங்களுக்கு பிளாக்கில் டிக்கெட் வாங்கிச் செல்வதை தவிர்க்கவும். 

பெண்களுக்கு :- கனவர்கள் கைக்குள் அடங்கி இருப்பார்கள். மாமியார்களால் மற்றும் நாத்தனார்களால் தொல்லை உண்டு. அனுசரித்துப்போவது நல்லது. மாமியாருக்கு பிடித்த சீரியல் பார்க்க தினமும் அரைமணிநேரம் ரிமோட்டை தருவது நல்ல பலனை தரும். குடும்பத்தில் நிம்மதி நிலவும். நீண்ட நாட்களாக மாமியாருடன் இருந்துவந்த கருத்து வேறுபாடு நீங்கும். 

மாணவர்களுக்கு:- நன்றாக படித்தால் முன்னேறும் வாய்ப்பு பிரகாசமாக உண்டு. தினமும் சரஸ்வதி ஸ்லோகம் சொல்லிவர படிப்பும், பெற்றோர்கள் சொல்வதைக் கேட்க நல்லபிள்ளை எனப் பெயர் வர வாய்ப்புண்டு. 

உத்யோகத்தில் இருப்போர்களுக்கு :- கடும் உழைப்பு நல்ல பலனைத்தரும். சட்டத்திற்கு உட்படாத காரியங்களை செய்ய வேண்டாம். லஞ்சம் வங்குவதை எப்போதும் தவிர்ப்பது கடமை என்றாலும் நமநமக்கும் கையை அமுக்கி வைத்துக்கொள்வது வேலைக்கு உத்தரவாதம் அளிக்கும். 

எல்லோருக்குமான பொதுப்பலன்கள் :- தேவையில்லாத வாக்குவாதத்தில் ஈடுபட வேண்டாம். செலவைக் குறைத்தால் சேமிப்பு வளரும். அண்ணன் தம்பி உறவு வலுப்பட மனைவியரின் பேச்சைக் கேட்டு நடக்க வேண்டாம். அக்காள் தங்கைகள் பொறாமைப் படுவதைக் குறைக்க வேண்டிய நேரமிது. 

சனிக்கிழமைதோறும் சனிபகவானுக்கு எள்ளோதரை படையலும், நல்லெண்ணெய் விளக்கும் இட்டு வழிபட்டால் சனியின் தொல்லைகளில் இருந்து விடுபடலாம். சுபம்.

கல்லுப்பட்டி எனும் தனி நாடு அல்லது மாநிலம்

இந்தியாவுல மாநிலங்கள் பிரியும்போது தமிழ்நாட்டில் எங்களுக்கு ஏன் தனி கல்லுப்பட்டி கூடாது?

எல்லைகள்...

குஞ்சுபட்டி குறுக்கு ரோடு கிழக்கெல்லை

தேவன்குறிச்சி கிராம குறுக்கு ரோடு மேற்கெல்லை

கொட்டாணிபட்டி தெற்கெல்லை

சோலபட்டி வடக்கெல்லையாக கொண்ட தனிக்கல்லுப்பட்டி நாடு அல்லது மாநிலம் அடைந்தே தீருவோம்..

ஊரின் சிறப்புகள்..

தண்ணீர் கிடையாது (மிக முக்கிய தகுதி)

உழுந்தவடை - அதன் தேசிய அடையாளம்

நன்னாரி சர்பத் - தேசிய பானம்

காக்கா - தேசிய பறவை

கருவேலம் - தேசிய மரம்

தனி மனித வருமானம் : 50 டாலர்கள் (ஆண்டுக்கு)

மக்கள் தொகை : 1 லட்சம் ( 2025ல்)

எங்களுடன் இணைந்துகொள்ள திருமங்கலம், மோதக்ம் சுப்புலாபுரம், காடநேரி, சத்திரப்பட்டி, வில்லூர், குண்டத்தூர், பேரையூர் ஆகிய ஊர்களையும் (மாநிலமாக ஆகாமல் இருக்கும் பட்சத்தில்) அழைப்போம்.

வாருங்கள் உறுதியான மாநிலம் அமைப்போம்.. 

இது தமிழ்நாட்டை இரண்டாக பிரிக்க வேண்டும் எனகோரிக்கை வைத்துள்ள மக்களை கிண்டல் செய்வதற்கு அல்ல என்பதை நீங்கள் உணர்ந்தே இருப்பீர்கள்..
---
ஜூன் 3, 2014ல் எழுதியது

தலைவர் ஜோக்குகள்

ரஜினியைப் பற்றிய செய்திகள் இந்தியா முழுக்க எப்போதும் இருக்கும். ரஜினி ஒண்றுமே செய்யாமல் சும்மா இருந்தாலும் அதுவும் செய்திதான்.

சமீபத்தில், ரஜினி உங்கள் மீது எவ்வளவு மரியாதை வைத்திருக்கிறார். அவரை நீங்கள் கிண்டலடிப்பது போல எஸ்எம்எஸ் அனுப்பியிருப்பது நியாயமா?' என ரஜினி ரசிகர்கல் சிலர் வருத்தப்பட்டு அமிதாப்புக்கு எழுத, பதறிப் போய் பதில் சொல்லியிருக்கிறார் அமிதாப்.

எந்த ஜோக்கும் ரஜினியை கிண்டலடிப்பது போல இருக்காது. இவை அனைத்திலுமே கற்பனை கூட செய்ய முடியாத அளவு உயர்வாக சித்தரிக்கப்பட்டிருப்பார் ரஜினி. போஸ்புக், ட்விட்டர், எஸ்எம்எஸ் என எங்கும் இந்த ரஜினி ஜோக்குகள்தான்.

தலைவர் ரசிகர்கள் அமிதாப்புக்கு வருத்ததுடன் எழுதிய ஜோக் இதுதான்

"கிரகாம் பெல் டெலிபோனைக் கண்டுபிடித்த போது, அவருக்கு ரஜினியிடமிருந்து இரு மிஸ்டு கால்கள் வந்திருப்பதைக் கண்டாராம்"

இது ஒரு நல்ல கற்பனை என்றே எழுதியிருந்தாராம்..

மேலும் ரஜினி எந்த அளவு உயர்வானவர், அவரால் முடியாத விஷயமே இல்லை என்பதை உணர்த்துவதாகவே உள்ளன. மிகவும் உன்னதமான மனிதர், மிகச் சிறந்த மனிதாபிமானி, கடவுளுக்கு நிகரானவர், அன்பு மிக்கவர்", என்று குறிப்பிட்டுள்ளார்


எந்திரன் வெற்றிக்குப் பிறகு ரஜினி குறித்த ஜோக்குகள் வட இந்தியாவில் அதிகம் புழங்குகின்றன.

டைம்ஸ் ஆஃப் இந்தியாவில் வெளியான சில ரஜினி ஜோக்குகளை கீழே தமிழ்படுத்தி இட்டிருக்கிறேன்.


-----------



01. சமீபத்தில் சீன விமானநிலையம் புகைமண்டலம் காரனமாக மூடப்பட்டது. புகைமண்டலத்திற்கான காரனம் கண்டறியப்பட்டது - இந்தியாவில் ரஜினி புகைபிடிக்கிறார்.


02. குழந்தையாக இருக்கும்போது ரஜினி 7 வெவ்வேறு பள்ளிகளில் படித்தார்..அவைகள் இன்று ஐ.ஐ.டி என அழைக்கப்படுகின்றன.


03. ரஜினிகாந்த் இந்தியாவில் வாழ்வதற்காக இந்திய அரசு ரஜினிக்கு வரி கட்டுகிறது.


04. ரஜினிகாந்த் சூரியனை கோபப்பட்டு நோக்கும்போது சந்திரனுக்குப் பின்னால் சூரியன் ஒளிந்துகொள்கிறது. அதுவே சூரியகிரகனம் என்றழைக்கபடுகிறது.


05. ஒருநாள் தூங்கி எழுந்தபின்னர் ரஜினி தனது அறிவில் 1 சதவீதத்தை உலகிற்கு கொடுத்தார். கூகிள் பிறந்தது.


06. ரஜினி 150 ஆண்டுகளுக்கு முன்னர் பிறந்திருந்தால் என்ன ஆகியிருக்கும்? பிரிட்டிஷார் சுதந்திரப்போராட்டம் நடத்திக்கொண்டிருந்திருப்பார்கள்.


07. கஜினிகூட ரஜினிய மறக்க மாட்டார்.


08. நிலநடுக்கம் எப்போது உண்டாகிறது? ரஜினியின் மொபைல் போன் வைப்ரேஷனில் இருக்கும்போது.


09. ரஜினி ஒரு நாள் பள்ளிக்கு மட்டம் போட்டு விட்டார், அப்போதிலிருந்து அந்த நாள் ஞாயிற்றுக்கிழமை என அழைக்கப்படுகிறது.


10. எகிப்திய பிரமிடுகள் என்பவை ரஜினிகாந்த் சிறுகுழந்தையாய் இருக்கும்போது பள்ளியில் செய்த பிராஜக்ட்டுகள்.


11. இஸ்ரோவே இனி கிடையாது. எல்லா ராக்கெட்டுகளையும் தலைவர் தீபாவளிக்காக வாங்கிவிட்டார்.


12. தலைவர் ஏன் நாலுபக்கமும் கினறு இருப்பதுபோல ஒரு ஏக்கர் நிலத்தை வாங்குகிறார்? கேரம் விளையாடுவதற்காக.


13. மிஷன் இம்பாஸிபிள் படத்திற்கு ரஜினிகாந்த் தான் முதலில் நடிக்கும்படி கேட்டுக்கொள்ளப்பட்டார். ஆனால் படத்தின் தலைப்பு அவரை அசிங்கப்படுத்துவடுபோல இருந்ததால் வேண்டம் எனச் சொல்லிவிட்டார். ( ரஜினியால முடியாததா??)


14. ரஜினி ஒரு அறைக்குள் நுழையும்போது விளக்கை ஏற்றுவதில்லை, இருட்டை விரட்டி விடுகிறார்.


15. ரஜினிகாந்த் உங்களை நோக்கி விரலைக் காண்பிக்கும்போது நீங்கள் பிழைத்திருக்க இன்னும் எத்தனை விநாடிகள் இருக்கிறது என்பதைச் சொல்கிறார்.


16. குளோபல் வார்மிங் அப்படின்னு ஒண்ணு கிடையவே கிடையாது. ரஜினி அப்படி ஒரு குளிர்ச்சி, அதனால சூரியன மேல பாத்து திருப்பி விட்டுட்டார்.


17. தலைவர் ஒருவாட்டி ஜெர்மன் ஃபைட்டர் ஜெட் விமானத்தை விரலாலேயே சுட்டுத்தள்ளினார். செஞ்சதெல்லாம் ”பேங்” (Bang) குனு கத்தியதுதான்..


18.கிழக்கிந்தியக் கம்பெணி இந்தியாவை விட்டு 1947ல் கிளம்பியது. ஏனெனில் ரஜினி 1949ல் பிறக்க வேண்டியது.


19. இந்தி கஜினியில் ரஜினி நடிப்பதாய் இருந்தது.. ஆனால் மறுத்துவிட்டார். ஏனெனில் ரஜினி மற்றவர்களுக்குத்தான் ஞாபக மறதியைக் கொடுப்பார்.


20. வரம் கொடுக்கும் பூதங்கள் ரஜினியை தேய்த்து மூன்று வரங்களை பெற்றுச் செல்லும்.


21. டெல்லி ராஜதானி ரயில் ஒருமுறை ரஜினியை விட்டுச் சென்றுவிட்டது. அதன் பின்னர் எத்தனை வேகமாய் ஓடியும் அவரைப் பிடிக்கமுடியவில்லை.

இன்றைய தேதிக்கு இந்தியாவிலேயே எல்லோருக்கும் தெரிந்த/ பிடித்த ஒரு நடிகர் இருக்கிறாரெனில் ரஜினிகாந்த் மட்டுமே. நமக்குத்தெரிந்து தமிழ், தெலுங்கு, கன்னடம், மலையாளத்திலும் அவரது திரைப்படங்கள் சக்கைப்போடுபோடுகின்றன. இத்தனைக்கும் பக்கத்து மாநிலங்களில் ரீமேக்கூட செய்யாமல் வெறும் டப்பிங் படங்களே பட்டையைக் கிளப்புகின்றன. அவரைப் பற்றிய செய்திகளுக்கும் குறைவில்லை. ஐஸ்வர்யாவுடன் ஜோடியாக நடித்துவிட்டு அதே கையோடு இமயமலைக்குச் செல்லும் பக்குவம் அவருக்கு மட்டுமே உண்டு.

எனது நூறாவது பதிவு இது..

மொத்தத்தில் உருப்படியாய் எத்தனை பதிவு தேறும் எனத் தெரியவில்லை. இனிமேலாவது ஒழுங்காய் எழுதவேண்டும் என்ற வைராக்கியத்துடன்..

ஜெயக்குமார்